భారత్-జపాన్ రక్షణ బంధాన్ని మరింత బలోపేతం చేసే దిశగా జోధ్‌పూర్ వైమానిక స్థావరంలో ఇరు దేశాల వైమానిక దళాల మధ్య సంయుక్త విన్యాసాలు మొదలుకానున్నాయి. సెప్టెంబర్ 9 నుంచి 22 వరకు జరిగే ఈ 'వీర్ గార్డియన్ 2026' విన్యాసాల కోసం జపాన్ బృందం ఇప్పటికే జోధ్‌పూర్‌కు చేరుకుంది.
జపాన్ ఎయిర్ సెల్ఫ్-డిఫెన్స్ ఫోర్స్ (జేఏఎస్‌డీఎఫ్)కు చెందిన రెండు సి-2 రవాణా విమానాలు జోధ్‌పూర్ వైమానిక స్థావరంలో దిగడంతో, ఈ విన్యాసాల రెండో ఎడిషన్‌కు జపాన్ బృందం అధికారికంగా చేరుకున్నట్టయింది. ఇరు దేశాల వైమానిక దళాల మధ్య పరస్పర సమన్వయం, కార్యాచరణ నైపుణ్యం, అవగాహనను మరింత పెంపొందించడమే ఈ విన్యాసాల లక్ష్యమని భారత వైమానిక దళం (ఐఏఎఫ్) ఒక ప్రకటనలో పేర్కొంది.
తొలిసారి భారత గడ్డపైకి జపాన్ ఎఫ్-2ఏ యుద్ధ విమానాలు
ఈ విన్యాసాల్లో భాగంగా జపాన్‌కు చెందిన మిత్సుబిషి ఎఫ్-2ఏ యుద్ధ విమానాలు తొలిసారిగా భారత గడ్డపైకి రానున్నాయి. లాక్‌హీడ్ మార్టిన్‌తో కలిసి అభివృద్ధి చేసిన ఈ యుద్ధ విమానం, అమెరికా ఎఫ్-16 డిజైన్‌తో పోలికలు కలిగి ఉంటుంది. గగనతల యుద్ధతంత్ర విన్యాసాలపై ప్రధానంగా దృష్టి సారించనున్న ఈ కసరత్తులో, ఇరు దేశాల సిబ్బంది సంక్లిష్ట కార్యాచరణ పరిస్థితుల్లో కలిసి శిక్షణ పొందనున్నారు.
భారత్-జపాన్ మధ్య రక్షణ సహకారం క్రమంగా విస్తరిస్తున్న నేపథ్యంలో ఈ విన్యాసాలు జరుగుతున్నాయి. గత నెలలో జపాన్ రక్షణ మంత్రి షింజిరో కొయిజుమి భారత్‌లో పర్యటించి, రక్షణ మంత్రి రాజ్‌నాథ్ సింగ్‌తో చర్చలు జరిపారు. రెండు వారాల పాటు సాగే ఈ విన్యాసాలు, భారత్-జపాన్ మధ్య దీర్ఘకాలిక స్నేహ బంధాన్ని మరింత సుస్థిరం చేస్తాయని ఐఏఎఫ్ పేర్కొంది.