శ్రీకాకుళం, ఆగస్టు 28: అట్టడుగు వర్గాల సంక్షేమానికి ఉద్దేశించిన 'పీ4' కార్యక్రమం చరిత్రలో నిలిచిపోతుందని, ఇది పేదల ఆర్థికాభివృద్ధికి ఎంతగానో దోహదపడుతుందని కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు స్పష్టం చేశారు.
- అమరావతి సచివాలయం నుంచి సీఎం చంద్రబాబు నిర్వహించిన ఉన్నత స్థాయి సమీక్షకు వీడియో కాన్ఫరెన్స్ ద్వారా హాజరైన కేంద్ర మంత్రి రామ్మోహన్ నాయుడు
- శ్రీకాకుళం జిల్లాలో లక్ష మందికి పైగా లబ్ధిదారుల గుర్తింపు, 51 వేల మందికి మార్గదర్శకులతో అనుసంధానం
- స్వర్ణాంధ్ర 2047 సాధన దిశగా విజన్ యాక్షన్ ప్లాన్ అమలులో రాష్ట్రంలోనే ముందంజలో శ్రీకాకుళం జిల్లా
- నేపాల్ వరదలపై ఢిల్లీ ఏపీ భవన్‌లో ప్రత్యేక సెల్ ఏర్పాటు — నేపాల్ ఎంబసీతో నిరంతర సంప్రదింపులు
శుక్రవారం అమరావతి సచివాలయం నుంచి ముఖ్యమంత్రి చంద్రబాబు నాయుడు నిర్వహించిన ఉన్నత స్థాయి సమీక్షకు శ్రీకాకుళం కలెక్టరేట్ నుంచి వీడియో కాన్ఫరెన్స్ ద్వారా జిల్లా కలెక్టర్ స్వప్నిల్ దినకర్ పుండ్కర్, ఇతర అధికారులతో కలిసి కేంద్ర మంత్రి రామ్మోహన్ నాయుడు హాజరయ్యారు. అనంతరం ఆయన మాట్లాడుతూ.. శ్రీకాకుళం జిల్లాలో లక్ష మందికి పైగా లబ్ధిదారులను గుర్తించగా, ఇప్పటికే 51 వేల మందిని మార్గదర్శకులకు అనుసంధానం చేసి వారి ఉపాధికి పూర్తి తోడ్పాటు అందిస్తున్నామని పేర్కొన్నారు. స్వర్ణాంధ్ర 2047 సాధన దిశగా విజన్ యాక్షన్ ప్లాన్ అమలులో శ్రీకాకుళం జిల్లా రాష్ట్రంలోనే ముందంజలో ఉందన్నారు. మూలపేట పోర్టు నిర్మాణాన్ని త్వరలోనే పూర్తి చేసి, దాని ద్వారా పరిశ్రమల స్థాపనకు మార్గం సుగమం చేస్తామని తెలిపారు.
డబుల్ ఇంజిన్ సర్కారు చొరవతో దశాబ్దాల నాటి నేరడి బ్యారేజీ ప్రాజెక్టు సమస్యకు పరిష్కారం లభించి, కార్యరూపం దాల్చడం పట్ల ఆయన ఆనందం వ్యక్తం చేశారు. కేంద్ర, రాష్ట్ర ప్రభుత్వాల భాగస్వామ్యంతో జిల్లాలోని దీర్ఘకాలిక సమస్యలన్నింటినీ క్రమంగా పరిష్కరిస్తున్నామని స్పష్టం చేశారు.
ఇక నేపాల్‌లో అనూహ్యంగా వచ్చిన వరదలపై స్పందిస్తూ, అక్కడి పరిస్థితులను కేంద్ర, రాష్ట్ర ప్రభుత్వాలు నిశితంగా పర్యవేక్షిస్తున్నాయని ఆయన తెలిపారు. ఢిల్లీలోని ఏపీ భవన్‌లో ప్రత్యేక సెల్ ఏర్పాటు చేసి, నేపాల్ ఎంబసీతో నిరంతరం సంప్రదింపులు జరుపుతున్నట్లు వివరించారు. రోడ్డు, నెట్‌వర్క్ వ్యవస్థ పునరుద్ధరణ కాగానే సహాయక చర్యలు మరింత వేగవంతం చేసి, బాధితులను సురక్షితంగా స్వస్థలాలకు రప్పిస్తామని ఆయన వెల్లడించారు. ఈ కార్యక్రమంలో జాయింట్ కలెక్టర్ ఫర్మాన్ అహ్మద్ ఖాన్, అసిస్టెంట్ కలెక్టర్ హరి ఓం పాండ్యా, సీపీవో ప్రసన్నలక్ష్మి పాల్గొన్నారు.