ఆంధ్రప్రదేశ్ ప్రభుత్వ పురపాలక పరిపాలన, పట్టణాభివృద్ధి శాఖ ముఖ్య కార్యదర్శి ఎస్. సురేష్ కుమార్, ఐఏఎస్, సెప్టెంబర్ 9న ముంబయిలో జరిగే ప్రతిష్ఠాత్మక 'ఐఎఫ్‌ఏటీ ఇండియా–2026' సదస్సుకు విశిష్ట అతిథిగా, వక్తగా హాజరుకానున్నారు. ఈ సందర్భంగా పట్టణ పరివర్తన దిశగా రాష్ట్ర ప్రభుత్వం చేపడుతున్న కార్యక్రమాలను ఆయన వివరించనున్నారు.
పుర పాలనా సంస్కరణలు, పారిశుధ్యం, ఘన వ్యర్థాల నిర్వహణ, సుస్థిర పట్టణ సేవల అందజేత, పట్టణ స్థానిక సంస్థల్లో సామర్థ్యాల పెంపు లక్ష్యంగా చేపట్టిన కార్యక్రమాలతో పట్టణ పరివర్తనలో ఆంధ్రప్రదేశ్ అగ్రగామి రాష్ట్రంగా నిలిచింది. ఐఎఫ్‌ఏటీ ఇండియా–2026 సదస్సు సెప్టెంబర్ 9 నుంచి 11 వరకు ముంబయిలోని బాంబే ఎగ్జిబిషన్ సెంటర్‌లో జరగనుంది. భారతదేశంలో వ్యర్థాల నిర్వహణ, పట్టణ సుస్థిరతకు సంబంధించిన వ్యవస్థను మరింత బలోపేతం చేయడమే ఈ సదస్సు ప్రధాన అజెండా.
వృత్తాకార ఆర్థిక వ్యవస్థలో మార్గదర్శక రాష్ట్రం
స్వచ్ఛ భారత్ మిషన్ 2.0 కింద చేపట్టిన పలు కార్యక్రమాల ద్వారా పట్టణ వ్యర్థాల నిర్వహణ, వృత్తాకార ఆర్థిక వ్యవస్థ అమలులో ఆంధ్రప్రదేశ్ మార్గదర్శక రాష్ట్రంగా నిలిచింది. అలాగే, 2025 జనవరి నుంచి ప్రతి నెలా నిర్వహిస్తున్న 'స్వర్ణాంధ్ర–స్వచ్ఛాంధ్ర' కార్యక్రమం ద్వారా వ్యర్థాల నిర్వహణ పట్ల ప్రజల ప్రవర్తనలో స్పష్టమైన మార్పు వచ్చింది. పట్టణాభివృద్ధి, పుర పాలన, సుస్థిర మౌలిక సదుపాయాలు, వ్యర్థాల నిర్వహణ రంగాల్లో ఆంధ్రప్రదేశ్ సాధించిన అనుభవాలు, ఆవిష్కరణలు, విజయాలను ఈ సదస్సులో ప్రముఖంగా ప్రదర్శించనున్నారు.
ఘన వ్యర్థాల నిర్వహణ, పునర్వినియోగం, వృత్తాకార ఆర్థిక వ్యవస్థ, నీరు, మురుగునీటి నిర్వహణకు సంబంధించిన పర్యావరణ సాంకేతికతలపై నిర్వహించే ప్రముఖ వాణిజ్య ప్రదర్శన ఐఎఫ్‌ఏటీ ఇండియా. భారతదేశ సుస్థిరత, పర్యావరణ లక్ష్యాలను వేగంగా సాధించేందుకు అవసరమైన పరిష్కారాలపై చర్చించడానికి కేంద్ర, రాష్ట్ర ప్రభుత్వాల ఉన్నతాధికారులు, విధాన నిర్ణేతలు, మౌలిక సదుపాయాల రంగ నిపుణులు, పట్టణ పాలనా నిపుణులు, పరిశ్రమల ప్రతినిధులు, సాంకేతిక పరిజ్ఞాన సంస్థలు, పెట్టుబడిదారులు, అభివృద్ధి భాగస్వాములను ఈ వేదిక ఒక్కచోట చేర్చుతుంది. పట్టణ నిర్వహణ, సేవల అందజేతకు సంబంధించిన ఉత్తమ పద్ధతులు, వినూత్న విధానాలు, ఆచరణాత్మక అనుభవాల పరస్పర మార్పిడికి సదస్సు అజెండాలో ప్రాధాన్యం ఇవ్వనున్నారు. తద్వారా చర్చలను మరింత ఫలవంతం చేయడంతోపాటు రాష్ట్రాల మధ్య సహకారాన్ని పెంపొందించనున్నారు.
సుస్థిర పారిశుధ్యంపై ప్యానల్ చర్చలో పాల్గొననున్న సురేష్ కుమార్
ఐఎఫ్‌ఏటీ ఇండియా–2026లో కేంద్ర గృహనిర్మాణ, పట్టణ వ్యవహారాల మంత్రిత్వ శాఖ '2027 అనంతరం పట్టణ పారిశుధ్యం: రాబోయే దశాబ్దంలో భారతదేశం ప్రాధాన్యం ఇవ్వాల్సిన అంశాలు' అనే అంశంపై ప్రత్యేక సదస్సును నిర్వహించనుంది. సెప్టెంబర్ 9న 'సుస్థిర పారిశుధ్యం కోసం పురపాలక సేవల అందజేతను మెరుగుపరచడం' అనే అంశంపై జరిగే చర్చలో సురేష్ కుమార్ ప్యానలిస్టుగా పాల్గొననున్నారు. పట్టణ పారిశుధ్య సేవలను సుస్థిరంగా కొనసాగించేందుకు పురపాలక సంస్థల ఆర్థిక వనరులను బలోపేతం చేయడం, పెట్టుబడులను ఆకర్షించడం, ప్రైవేటు రంగ భాగస్వామ్యాన్ని పెంపొందించడం వంటి విధానాలపై ఈ చర్చలో ప్రధానంగా దృష్టి సారించనున్నారు.
స్వచ్ఛాంధ్ర కార్పొరేషన్ మేనేజింగ్ డైరెక్టర్ బి. సునీల్ కుమార్ రెడ్డి, ఐఎఫ్‌ఎస్, ఆంధ్రప్రదేశ్‌కు చెందిన కొన్ని పట్టణ స్థానిక సంస్థల అధికారులు కూడా ఈ మూడు రోజుల సదస్సుకు హాజరుకానున్నారు.