వేగవంతమైన సరుకు రవాణా దిశగా భారతీయ రైల్వే మరో ముందడుగు వేసింది. దేశంలోనే తొలి వందే భారత్ సరుకు రవాణా రైలు అహ్మదాబాద్-ముంబై మార్గంలో నిర్వహించిన ట్రయల్ రన్‌లో గంటకు 130 కి.మీ. వేగాన్ని అందుకుంది.
- అహ్మదాబాద్-ముంబై మార్గంలో వందే భారత్ సరుకు రవాణా రైలు తొలి ట్రయల్ రన్
- గంటకు 130 కి.మీ. గరిష్ఠ వేగాన్ని అందుకున్న రైలు
- సంప్రదాయ గూడ్స్ రైళ్ల కంటే వేగంగా, తక్కువ సమయంలో సరుకు రవాణా లక్ష్యం
- లాజిస్టిక్స్ ఖర్చు తగ్గించి పరిశ్రమలకు ఊతమిచ్చేలా రూపకల్పన
ప్రయాణికుల వందే భారత్ రైళ్ల తరహాలోనే అధునాతన సాంకేతికతతో రూపొందించిన ఈ సరుకు రవాణా రైలు, తేలికపాటి డిజైన్‌, మెరుగైన బ్రేకింగ్ వ్యవస్థతో అధిక వేగాన్ని అందుకోగలదని రైల్వే అధికారులు తెలిపారు. ప్రస్తుతం నడుస్తున్న సంప్రదాయ గూడ్స్ రైళ్ల కంటే వేగంగా, తక్కువ సమయంలో సరుకును గమ్యస్థానానికి చేర్చడం దీని ప్రధాన లక్ష్యం.
దేశీయ లాజిస్టిక్స్ వ్యయాన్ని తగ్గించి, పరిశ్రమలకు మరింత ఊతమిచ్చే దిశగా ఈ ప్రాజెక్టును రూపొందించినట్టు రైల్వే మంత్రిత్వ శాఖ వెల్లడించింది. విజయవంతమైన ట్రయల్స్ అనంతరం దశలవారీగా ఇతర పారిశ్రామిక కారిడార్లలోనూ ఇలాంటి రైళ్లను ప్రవేశపెట్టే యోచనలో ఉన్నట్టు అధికారులు తెలిపారు.