న్యూఢిల్లీ, అక్టోబర్ 17 (ఎక్స్‌ప్రెస్ టుడే): అమెరికా విదేశాంగ మంత్రి మార్కో రూబియో శనివారం నుంచి ఈ నెల 22 వరకు ఉజ్బెకిస్థాన్, భారత్‌లో పర్యటిస్తున్నారు. భారత పర్యటనలో ఆయన ముంబై, జామ్‌నగర్‌లను సందర్శిస్తారని అమెరికా విదేశాంగ శాఖ ప్రకటించింది.
ఇంధన సహకారం, వాణిజ్యం, పెట్టుబడులు, వ్యూహాత్మక భాగస్వామ్యంపై ఆయన చర్చలు జరుపుతారు. ఈ ఏడాది రూబియో భారత్‌కు రావడం ఇది రెండోసారి; మే నెలలో ఆయన ఇప్పటికే పర్యటించారు. ఈ పర్యటన వ్యాపార అంశాలకు ప్రాధాన్యమిస్తుందని భారత్‌లోని అమెరికా రాయబారి సెర్జియో గోర్ తెలిపారు. ప్రకటించిన షెడ్యూల్‌లో న్యూఢిల్లీ లేకపోవడం చర్చనీయాంశమైంది. భారత్‌కు రావడానికి ముందు రూబియో ఉజ్బెకిస్థాన్‌లోని సమర్‌ఖండ్‌లో మధ్య ఆసియా దేశాల ‘సీ5+1’ మంత్రుల స్థాయి సమావేశంలో పాల్గొంటారు.
వాణిజ్య ఒప్పందంపై
ఇదిలా ఉండగా, భారత్–అమెరికా ద్వైపాక్షిక వాణిజ్య ఒప్పందంలో మొదటి విడత ఖరారైందని, ప్రస్తుతం న్యాయపరమైన ముసాయిదా రూపకల్పన జరుగుతోందని కేంద్ర వాణిజ్య శాఖ మంత్రి పీయూష్ గోయల్ గురువారం ఢిల్లీలో తెలిపారు. ఇతర దేశాలతో పోలిస్తే భారత్‌కు పోటీ ప్రయోజనం లభించిన తర్వాత దీనిని అమల్లోకి తెస్తామని చెప్పారు. అమెరికా తన సుంకాల విధానాన్ని అధికారికంగా ఖరారు చేసిన తర్వాతే సంతకాలు జరుగుతాయని వాణిజ్య కార్యదర్శి రాజేశ్ అగర్వాల్ పేర్కొన్నారు. భారత్–యూరోపియన్ యూనియన్ స్వేచ్ఛా వాణిజ్య ఒప్పందం డిసెంబరులో కుదురుతుందని గోయల్ చెప్పారు.