న్యూఢిల్లీ, అక్టోబర్ 27 (ఎక్స్‌ప్రెస్ టుడే): డిజిటల్ వ్యక్తిగత డేటా పరిరక్షణ (డీపీడీపీ) చట్టం–2023, డీపీడీపీ నిబంధనలు–2025లోని కొన్ని అంశాలను సవాల్ చేస్తూ డిజిటల్ న్యూస్ పబ్లిషర్స్ అసోసియేషన్ (డీఎన్‌పీఏ) దాఖలు చేసిన రిట్ పిటిషన్‌పై సుప్రీంకోర్టు మంగళవారం కేంద్ర ప్రభుత్వానికి నోటీసు జారీ చేసింది. ఈ కేసు తదుపరి విచారణ నవంబర్ 17న జరగనుంది.
ఈ చట్టం పత్రికా స్వేచ్ఛను, సమాచార హక్కును దెబ్బతీస్తోందని పిటిషనర్లు ఆరోపిస్తున్నారు. 21 మీడియా సంస్థలతో కూడిన ఈ సంఘం, ముఖ్యంగా సమాచార హక్కు చట్టంలోని సెక్షన్ 8(1)(జె)కు చేసిన సవరణ ద్వారా ప్రజా ప్రయోజన వెల్లడి రక్షణను తొలగించడాన్ని సవాల్ చేస్తోంది. మధ్యంతర ఉపశమనంగా స్టే కోరుతున్న అభ్యర్థనపైనా కోర్టు నోటీసు ఇచ్చింది.
ఇరుపక్షాల వాదనలు
డేటా పరిరక్షణ చట్టంలోని సమ్మతి నిబంధనల వల్ల సాధారణ వార్తా సేకరణ, ప్రత్యక్ష ప్రసార జర్నలిజం కష్టతరమవుతాయని న్యూస్ పబ్లిషర్లు వాదిస్తున్నారు. మరోవైపు వ్యక్తిగత గోప్యతకు అర్థవంతమైన రక్షణ అవసరమని, గోప్యత, సమాచార హక్కు మధ్య సమతుల్యతను ఈ సవరణ సాధిస్తుందని కేంద్ర ప్రభుత్వ వైఖరి.