న్యూఢిల్లీ, అక్టోబర్ 20 (ఎక్స్‌ప్రెస్ టుడే): పెరుగుతున్న శీతాకాల కాలుష్యాన్ని ఎదుర్కొనేందుకు ఢిల్లీ ప్రభుత్వం మంగళవారం సమగ్ర ‘శీతాకాల కార్యాచరణ ప్రణాళిక’ను ప్రకటించింది. ముఖ్యమంత్రి రేఖా గుప్తా నేతృత్వంలో రూపొందిన ఈ ప్రణాళిక నవంబర్ 1 నుంచి ఫిబ్రవరి 28 వరకు అమల్లో ఉంటుంది.
ఇందులో ‘పీయూసీ లేకుంటే ఇంధనం లేదు’ విధానం, ఢిల్లీ వెలుపలి నుంచి వచ్చే బీఎస్-6 ప్రమాణాలకు తక్కువ వాహనాల ప్రవేశంపై ఆంక్షలు, నిర్మాణ, కూల్చివేత పనులపై పరిమితులు, నిర్మాణ స్థలాల ఏఐ ఆధారిత పర్యవేక్షణ, దశలవారీ కార్యాలయ వేళలు, 50 శాతం వర్క్ ఫ్రమ్ హోం వంటి చర్యలు ఉన్నాయి. బీఎస్-6 కాని బయటి వాహనాలపై నిషేధం జనవరి 31 వరకు ఉంటుందని ఔట్‌లుక్ పేర్కొంది.
ప్రజా రవాణాపై దృష్టి
ప్రభుత్వం ఎలక్ట్రిక్ బస్సులను అందుబాటులోకి తెచ్చిందని, మెట్రో మార్గాలు విస్తరించాయని, చివరి మైలు అనుసంధానం మెరుగుపరిచే పనులు సాగుతున్నాయని, కార్‌పూలింగ్‌ను ప్రోత్సహిస్తామని రేఖా గుప్తా చెప్పారు.
గత ఏడాది ఇదే సమయంలో ప్రజలు అత్యంత కఠిన చర్యలు కోరారని, ఆ స్ఫూర్తితోనే ఈసారి ముందుగానే చర్యలు చేపట్టామని ఆమె ‘ఎక్స్’లో పోస్ట్ చేసిన వీడియో సందేశంలో తెలిపారు. ‘మన ఢిల్లీ, మన బాధ్యత’ అంటూ కాలుష్య నియంత్రణలో ప్రజలు భాగస్వాములు కావాలని కోరారు.