ఇరాన్ ఆర్థిక వ్యవస్థను పూర్తిగా ప్రపంచం నుంచి వేరుచేసే లక్ష్యంతో అమెరికా ట్రెజరీ కార్యదర్శి స్కాట్ బెసెంట్ సోమవారం 'ఆపరేషన్ ఎకనామిక్ అవుట్‌కాస్ట్' పేరుతో కొత్త ఆంక్షల పరంపరను ప్రకటించారు. దీన్ని 'ఎకనామిక్ డి-డే'గా ఆయన అభివర్ణించారు.
వాషింగ్టన్: అధ్యక్షుడు డొనాల్డ్ ట్రంప్ ఆదేశాల మేరకు ఇరాన్‌తో వాణిజ్య సంబంధాలు కొనసాగిస్తున్న దేశాలపై విస్తృత సెకండరీ ఆంక్షలు విధిస్తున్నట్టు బెసెంట్ తెలిపారు. డిజిటల్ అసెట్స్, టెక్నాలజీ, గోల్డ్, ఏవియేషన్, షిప్పింగ్ రంగాలను లక్ష్యంగా చేసుకుని ఇరాన్ ఆదాయ మార్గాలను పూర్తిగా మూసివేయాలన్నదే ఈ కార్యక్రమ ఉద్దేశమని ఆయన వివరించారు. అక్రమ చమురు రవాణా, అణు-క్షిపణి సాంకేతికత సేకరణ, సైబర్ కార్యకలాపాలకు సంబంధించి దాదాపు 60 సంస్థలు, వ్యక్తులు, నౌకలపై ట్రెజరీ శాఖ ఆంక్షలు విధించింది.
"ఇరాన్ ముందు ఇప్పుడు రెండే మార్గాలు ఉన్నాయి- పూర్తి ప్రపంచ ఏకాకితనం, జీవన్మరణ ఆర్థిక వ్యవస్థ లేదా ప్రపంచ ఆర్థిక వ్యవస్థలో తిరిగి చేరే అవకాశం" అని బెసెంట్ విలేకరుల సమావేశంలో పేర్కొన్నారు. ఇరాన్‌తో లావాదేవీలు సాగించే దేశాలకు తమ వైఖరి మార్చుకునేందుకు అవకాశం ఇస్తున్నామని, అయితే ఇరాన్ తరఫున మనీలాండరింగ్‌కు సహకరించే ఏ సంస్థ అయినా అమెరికా డాలర్ వ్యవస్థ నుంచి తొలగించబడుతుందని ఆయన హెచ్చరించారు. యూఏఈ, హాంకాంగ్, చైనా, సింగపూర్, స్విట్జర్లాండ్‌సహా పలు ప్రాంతాల్లో పనిచేస్తున్న బ్రోకర్లు, షాడో ఫ్లీట్ నౌకల నెట్‌వర్క్‌ను కూడా ఈ ఆంక్షలు లక్ష్యంగా చేసుకున్నాయని ట్రెజరీ శాఖ తెలిపింది.
ప్రపంచ నేతలతో ట్రంప్ నేరుగా ఫోన్‌లో మాట్లాడుతూ ఇరాన్‌తో సంబంధాలు తెంచుకోవాలని కోరుతున్నట్టు బెసెంట్ వెల్లడించారు. మరోవైపు, ఇరాన్ జాతీయ భద్రతా మండలి చీఫ్ మొహసిన్ రజాయి అమెరికా ఆంక్షలకు 'తీవ్రస్థాయి'లో ప్రతీకారం తీర్చుకుంటామని హెచ్చరించారు. అమెరికా ఆంక్షలకు మద్దతిచ్చే ఏ దేశాన్నయినా 'యుద్ధ చర్య'గా పరిగణిస్తామని ఇరాన్ విదేశాంగ మంత్రి అబ్బాస్ అరాఘ్చీ వ్యాఖ్యానించారు. ఇరాన్ కరెన్సీ రియాల్ డాలర్‌తో పోలిస్తే రికార్డు కనిష్టానికి పడిపోగా, ఈ ఏడాది ఇరాన్ ఆర్థిక వ్యవస్థ 5.5 శాతం క్షీణించనుందని అంతర్జాతీయ ద్రవ్య నిధి (ఐఎంఎఫ్) అంచనా వేసింది.