ఉక్రెయిన్‌లోని వొలిన్ ప్రాంతంలో, పోలండ్ సరిహద్దుకు కేవలం రెండు కిలోమీటర్ల దూరంలో కీవ్-వార్సా ప్రయాణికుల రైలు లోకోమోటివ్‌పై రష్యా డ్రోన్ దాడి చేసింది. అదే రాత్రి యహోదిన్-దొరహుస్క్ సరిహద్దు వద్ద ఒక పెట్రోల్ బంక్‌పైనా దాడి జరిగింది.
- పోలండ్ సరిహద్దుకు 2 కి.మీ. దూరంలో కీవ్-వార్సా రైలుపై డ్రోన్ దాడి
- అదే రాత్రి యహోదిన్-దొరహుస్క్ సరిహద్దు వద్ద పెట్రోల్ బంక్‌పై దాడి
- ఘటనపై పోలండ్ ప్రధాని టస్క్ తీవ్ర ఆందోళన వ్యక్తం
- నాటో సరిహద్దులకు యుద్ధం చేరువవుతున్న వైనంపై ఐరోపాలో ఆందోళన
రష్యా వరుసగా చేస్తున్న డ్రోన్, క్షిపణి దాడులు ఇప్పుడు నేరుగా నాటో సభ్య దేశమైన పోలండ్ సరిహద్దుకు అత్యంత సమీపానికి చేరడం ఆందోళన కలిగిస్తోంది. ఈ ఘటనపై పోలండ్ ప్రధాని డొనాల్డ్ టస్క్ తీవ్ర ఆందోళన వ్యక్తం చేస్తూ, ఇది ఉద్దేశపూర్వకంగానే జరిగిందా అన్న కోణంలో దర్యాప్తు జరుపుతున్నట్టు తెలిపారు.
రష్యా ఇంధన మౌలిక సదుపాయాలను లక్ష్యంగా చేసుకుని దాడులు కొనసాగిస్తుండటంతో, కీవ్ మేయర్ విటాలీ క్లిచ్కో ఇంధన కొరత తలెత్తే అవకాశం ఉందని హెచ్చరించారు. ప్రతి పెట్రోల్ బంకు వద్ద బాంబు షెల్టర్లు నిర్మించే వనరులు నగరపాలికకు లేవని, డ్రోన్లను అడ్డుకునేందుకు అవసరమైన ఆయుధాలు కూడా సరిపడా లేవని ఆయన పేర్కొన్నారు.