రియాద్ (ఎక్స్‌ప్రెస్ టుడే): సౌదీ అరేబియా రాజధాని రియాద్‌లోని విమానాశ్రయంపై శనివారం మరోసారి దాడి జరిగింది.
విమానాశ్రయంలో భారీ పేలుడు శబ్దం వినిపించిందని ప్రత్యక్ష సాక్షులు, ఈ విషయం తెలిసినవారు చెప్పారు. విమానాశ్రయంపై మళ్లీ దాడి జరిగిందని ఇద్దరు ప్రాంతీయ అధికారులు ఏపీ వార్తా సంస్థకు తెలిపారు. విమానాశ్రయంలోని ప్రజలను ఖాళీ చేయించారని ముగ్గురు సాక్షులు ఏఎఫ్‌పీకి చెప్పారు. విమానాశ్రయానికి బయలుదేరే ముందు విమాన స్థితిని సరిచూసుకోవాలని అధికారులు ప్రయాణికులకు సూచించారు. ఈ దాడిలో గాయపడినవారిలో కనీసం ఐదుగురు ఇంటెన్సివ్ కేర్‌లో ఉన్నారని టైమ్స్ ఆఫ్ ఇజ్రాయెల్ పేర్కొంది. దాడివల్ల విమానాశ్రయ కార్యకలాపాలను సౌదీ తాత్కాలికంగా నిలిపివేయాల్సి వచ్చిందని వాషింగ్టన్ పోస్ట్ తెలిపింది.
యెమెన్‌లో హూతీలకు, సౌదీ మద్దతున్న యెమెన్ ప్రభుత్వ దళాలకు మధ్య పోరాటం తీవ్రమైంది. ఎర్ర సముద్ర తీరం వెంబడి ఇటీవల హూతీలు సాధించిన పురోగతిని వెనక్కి మళ్లించే ప్రయత్నంలో సౌదీ నేతృత్వంలోని కూటమి ప్రభుత్వ దళాలకు వైమానిక సహాయం అందిస్తోంది.
హూతీల సామర్థ్యాలను లక్ష్యంగా చేసుకుని విస్తృత స్థాయి ఆపరేషన్ చేపట్టామని, హూతీల అధీనంలోని ప్రాంతాల్లో 136 సైనిక లక్ష్యాలను ధ్వంసం చేశామని కూటమి ప్రతినిధి ఒక ప్రకటనలో తెలిపినట్టు రాయిటర్స్ పేర్కొంది. యెమెన్ ప్రభుత్వ దళాలకు 24 గంటలూ వైమానిక సహాయం అందిస్తున్నామని కూడా ఆయన చెప్పారు.
ట్రంప్ వ్యాఖ్య
హూతీలపై సౌదీ అరేబియా చేపట్టే దాడుల్లో పాల్గొనే అంశాన్ని పరిశీలిస్తామని అమెరికా అధ్యక్షుడు డొనాల్డ్ ట్రంప్ శనివారం అన్నారు. ఆయన వ్యాఖ్యలు సౌదీతో కలిసి హూతీలపై అమెరికా నేరుగా సైనిక చర్యలో పాల్గొనే అవకాశాన్ని తోసిపుచ్చలేదని జెరూసలేం పోస్ట్ పేర్కొంది. సౌదీలో హూతీల దాడుల్లో ఒక అమెరికన్ మృతి చెందినట్టు కూడా ఆ పత్రిక తెలిపింది.