హార్ముజ్ జలసంధి బెదిరింపులతో, ఒత్తిడితో తెరుచుకోదని, ఇరాన్ వెనక్కి తగ్గదని ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి మేజర్ జనరల్ మొహ్సెన్ రెజాయీ మంగళవారం స్పష్టం చేశారు.
అమెరికా ఖజానా కార్యదర్శి స్కాట్ బెసెంట్ చేసిన తాజా వ్యాఖ్యలను “భ్రమాత్మక అంచనాలు”గా కొట్టిపారేసిన రెజాయీ, “మీరు సైనిక యుద్ధంలో ఓడిపోయారు, ఆర్థిక యుద్ధంలోనూ ఓడిపోతారు” అని ‘ఎక్స్’లో రాశారు.
యుద్ధానికి ముందుతో పోలిస్తే తమ ఆయుధ, రక్షణ పరికరాల ఉత్పత్తి సామర్థ్యం 2.5 రెట్లు పెరిగిందని, కొన్ని ఆయుధాల్లో మూడు రెట్లకు పైగా పెరిగిందని ఇరాన్ రక్షణ శాఖ ప్రతినిధి రెజా తలాయీ నిక్ ప్రకటించారు. రష్యా, చైనాలతో రక్షణ సహకారం కొనసాగుతోందని చెప్పారు. యుద్ధంలో ఇరాన్ రక్షణ ఉత్పత్తి సామర్థ్యంలో అధిక భాగం ధ్వంసమైందని ట్రంప్ ప్రభుత్వం పదేపదే చెబుతోంది.
సోమవారం హార్ముజ్ జలసంధి నుంచి బయటకు వస్తున్న ఒక చమురు ట్యాంకర్ గుర్తుతెలియని క్షిపణి దాడికి గురైందని, దర్యాప్తు జరుగుతోందని బ్రిటిష్ నౌకాదళ సముద్ర వాణిజ్య కార్యకలాపాల కేంద్రం (యూకేఎంటీఓ) తెలిపింది. గత మూడు నెలల్లో హార్ముజ్‌లో 13 వాణిజ్య నౌకలను ధ్వంసం చేసినట్లు అమెరికా సెంట్రల్ కమాండ్ సోమవారం ప్రకటించింది.