దక్షిణ-పశ్చిమ ఢిల్లీలోని సత్యా నికేతన్ ప్రాంతంలో ఆదివారం మధ్యాహ్నం ఐదంతస్తుల భవనం కుప్పకూలిన ఘటనలో పలువురు మృతి చెందగా, మరికొందరు శిథిలాల్లో చిక్కుకుపోయారు. 'హాస్టల్ డేజ్' పేరుతో బాలుర పేయింగ్ గెస్ట్ వసతిగా వినియోగిస్తున్న ఈ భవనం, ఢిల్లీ యూనివర్సిటీ సౌత్ క్యాంపస్‌కు సమీపంలో దట్టమైన జనావాసం మధ్య ఉంది.
మధ్యాహ్నం సుమారు 1.30 గంటల ప్రాంతంలో ఈ ఘటన చోటుచేసుకున్నట్టు అధికారులు తెలిపారు. భవనం బేస్‌మెంట్‌లో మరమ్మతు పనులు జరుగుతుండగానే కుప్పకూలినట్టు పోలీసు వర్గాలు వెల్లడించాయి. సంఘటనా స్థలానికి సమీపంలోని నానక్‌పురా గురుద్వారా వద్ద భవనం కూలిన సమాచారంతో మధ్యాహ్నం 1.34 గంటలకు పోలీసులకు పీసీఆర్ కాల్ అందింది. వెంటనే ఢిల్లీ అగ్నిమాపక దళం, ఎన్‌డీఆర్‌ఎఫ్ బృందాలు, స్థానిక పోలీసులు రంగంలోకి దిగి సహాయక చర్యలు చేపట్టారు.
30 నుంచి 50 మంది వరకూ చిక్కుకుపోయినట్టు అంచనా
75 మంది సామర్థ్యం గల ఈ హాస్టల్‌లో ఘటన సమయంలో సుమారు 40 నుంచి 50 మంది విద్యార్థులు ఉన్నట్టు స్థానికులు తెలిపారు. ఆదివారం కావడంతో చాలామంది విద్యార్థులు ఇళ్లకు వెళ్లడంతో ప్రాణనష్టం మరింత తగ్గిందని అధికారులు భావిస్తున్నారు. శిథిలాల్లో నుంచి పలువురిని రక్షించగా, మరికొందరు సహాయం కోసం ఫోన్ కాల్స్ చేస్తున్నట్టు స్థానిక ప్రజాప్రతినిధులు తెలిపారు. జేసీబీ యంత్రాలతో శిథిలాలను తొలగిస్తూ సహాయక చర్యలు కొనసాగుతున్నాయి.
ఘటనపై ప్రధాని నరేంద్ర మోదీ దిగ్భ్రాంతి వ్యక్తం చేస్తూ, మృతుల కుటుంబాలకు సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు. కేంద్ర హోంమంత్రి అమిత్ షా ఢిల్లీ ముఖ్యమంత్రి రేఖా గుప్తా, పోలీసు కమిషనర్, ఎన్‌డీఆర్‌ఎఫ్ చీఫ్‌తో మాట్లాడి పరిస్థితిని సమీక్షించారు. క్షతగాత్రులకు అన్ని విధాలా వైద్య సాయం అందించేలా అన్ని విభాగాలు సమన్వయంతో పనిచేస్తున్నాయని హోంమంత్రి తెలిపారు. ఘటనపై విచారణకు ఆదేశాలు జారీ అయ్యాయి.