భారత్‌కు ఎస్-400 ట్రయంఫ్ దీర్ఘశ్రేణి క్షిపణి రక్షణ వ్యవస్థల సరఫరాలో ఎలాంటి జాప్యం జరగడం లేదని రష్యా రక్షణ ఎగుమతి సంస్థ రోసోబోరాన్ ఎక్స్‌పోర్ట్ స్పష్టం చేసింది. భారత అవసరాలకు అనుగుణంగా 2026 చివరినాటికి మొత్తం అయిదు రెజిమెంట్ల డెలివరీని పూర్తి చేస్తామని సంస్థ సీఈవో అలెగ్జాండర్ మిఖీవ్ వెల్లడించారు.
- ఎస్-400 ఒప్పందంలో ఎలాంటి జాప్యం లేదని స్పష్టం చేసిన రోసోబోరాన్ ఎక్స్‌పోర్ట్
- 2026 చివరికల్లా మొత్తం అయిదు రెజిమెంట్ల డెలివరీ పూర్తి అవుతుందని ప్రకటన
- ఇప్పటికే నాలుగో రెజిమెంట్ సముద్రమార్గంలో భారత్‌కు చేరిన సంగతి ప్రస్తావన
- దేశీయ కుశ దీర్ఘశ్రేణి క్షిపణి వ్యవస్థతో సమాంతరంగా దిగుమతి సామర్థ్యాన్ని పెంచుకుంటున్న భారత్
2018లో భారత్-రష్యా మధ్య కుదిరిన సుమారు రూ.40,000 కోట్ల ఒప్పందం మేరకు ఐదు ఎస్-400 రెజిమెంట్లను భారత్‌కు సరఫరా చేయాల్సి ఉంది. ఇప్పటికే నాలుగో రెజిమెంట్ సముద్రమార్గంలో భారత్‌కు చేరినట్టు గతంలో వెల్లడైంది. మిగిలిన డెలివరీలను నిర్ణీత గడువులోగా పూర్తి చేస్తామని రష్యా భరోసా ఇచ్చింది.
ఇదే సమయంలో, దేశీయంగా అభివృద్ధి చేస్తున్న 'కుశ' దీర్ఘశ్రేణి ఉపరితలం నుంచి గగనతలానికి ప్రయోగించే క్షిపణి వ్యవస్థపైనా డీఆర్డీవో వేగంగా పనిచేస్తోంది. దిగుమతి చేసుకుంటున్న ఎస్-400లతో పాటు, స్వదేశీ సామర్థ్యాలను సమాంతరంగా విస్తరించడం ద్వారా దీర్ఘకాలంలో వైమానిక రక్షణలో స్వావలంబన సాధించాలన్నది భారత్ లక్ష్యం.