రాజధాని అమరావతిలో నిర్మిస్తున్న సెక్రటేరియట్, అసెంబ్లీ, హైకోర్టు భవనాల ఇంటీరియర్ డిజైన్లపై ముఖ్యమంత్రి నారా చంద్రబాబు నాయుడు సమీక్షించారు. రాజధాని నగర నిర్మాణంలో కీలక దశలో ఉన్న ఈ మూడు ప్రధాన భవన సముదాయాల లోపలి డిజైన్లపై ప్రత్యేక దృష్టి సారించారు.
ప్రముఖ ఆర్కిటెక్ట్ సంస్థ నార్మన్ ఫోస్టర్స్ ప్రతినిధుల బృందం ఇంటీరియర్ డిజైన్లను ప్రజెంట్ చేసింది. వర్క్ స్పేస్‌ల ఏర్పాటు, వెలుతురు, గాలి ప్రసరణ, ఫర్నిచర్ నమూనాలు, పబ్లిక్ ఏరియాల రూపకల్పనతో పాటు, భవనాల లోపలి భాగాల్లో సంప్రదాయ, ఆధునిక శైలుల మేళవింపుపై ప్రజెంటేషన్‌లో వివరణ ఇచ్చినట్టు తెలిసింది. దీనిపై సీఎం చంద్రబాబు పలు సూచనలు చేశారు.
ప్రపంచవ్యాప్తంగా పేరొందిన బ్రిటిష్ ఆర్కిటెక్చర్ సంస్థ అయిన నార్మన్ ఫోస్టర్స్, గతంలో లండన్‌లోని సిటీ హాల్, బీజింగ్ విమానాశ్రయం వంటి ప్రతిష్టాత్మక ప్రాజెక్టులను రూపొందించిన సంస్థగా గుర్తింపు పొందింది. అమరావతి రాజధాని మాస్టర్ ప్లాన్‌లో భాగంగా ప్రభుత్వ భవనాల డిజైన్ల కోసం ఈ సంస్థ సేవలను వినియోగించుకుంటున్నారు.
ఈ సమీక్షలో మంత్రి నారాయణ, పట్టణాభివృద్ధి శాఖ, సీఆర్డీఏలకు చెందిన ఉన్నతాధికారులు పాల్గొన్నారు. నిర్మాణ పనుల పురోగతిని ఎప్పటికప్పుడు సమీక్షిస్తూ, నిర్దేశిత గడువులోగా భవనాలను పూర్తి చేసేలా చర్యలు తీసుకోవాలని అధికారులను సీఎం ఆదేశించినట్టు తెలిసింది.