విశాఖపట్నం/పద్మనాభం, అక్టోబర్ 24: జిల్లాలో నవంబర్ 3న జరగనున్న మండల, జిల్లా పరిషత్ ఎన్నికలను ప్రశాంతంగా, పారదర్శకంగా, నిబంధనల మేరకు నిర్వహించేందుకు అవసరమైన అన్ని ఏర్పాట్లను పకడ్బందీగా చేపట్టాలని జిల్లా కలెక్టర్, ఎన్నికల అధికారి ఎం. అభిషిక్త్ కిశోర్ అధికారులను ఆదేశించారు.
క్షేత్రస్థాయి పర్యటనలో భాగంగా శనివారం పద్మనాభం మండలాన్ని సందర్శించిన ఆయన ఎంపీటీసీ అభ్యర్థుల నామినేషన్ల స్క్రూటినీ ప్రక్రియను పరిశీలించారు. ఎన్నికల నిబంధనల ప్రకారం నామినేషన్ పత్రాలను క్షుణ్ణంగా పరిశీలించాలని, అభ్యర్థులు సమర్పించిన పత్రాలు, అవసరమైన ధ్రువపత్రాలను నిబంధనల మేరకు తనిఖీ చేయాలని అధికారులకు సూచించారు. స్క్రూటినీ ప్రక్రియలో పారదర్శకత పాటిస్తూ, అభ్యర్థులందరికీ ఎన్నికల నిబంధనల ప్రకారం సమాన అవకాశాలు కల్పించాలని స్పష్టం చేశారు. ఈ సందర్భంగా అక్కడ ఉన్న అభ్యర్థులతో మాట్లాడి నామినేషన్ల పరిశీలన ప్రక్రియకు సంబంధించిన వివరాలను తెలుసుకున్నారు.
అనంతరం పరిషత్ ఎన్నికల నిర్వహణకు సంబంధించి పద్మనాభంలో ఏర్పాటు చేస్తున్న పోలింగ్ కేంద్రాలు, కౌంటింగ్ కేంద్రాలు, స్ట్రాంగ్ రూమ్‌లను జిల్లా కలెక్టర్ నిశితంగా పరిశీలించారు. పోలింగ్ కేంద్రాల్లో ఓటర్లకు అవసరమైన కనీస సౌకర్యాలు కల్పించాలని, ఎన్నికల సిబ్బందికి ఎలాంటి ఇబ్బందులు తలెత్తకుండా ముందస్తు ఏర్పాట్లు పూర్తి చేయాలన్నారు.
కౌంటింగ్ కేంద్రాల్లో ఓట్ల లెక్కింపు సజావుగా నిర్వహించేందుకు అవసరమైన వసతులు, భద్రతా ఏర్పాట్లను సమీక్షించారు. పోలింగ్ అనంతరం బ్యాలెట్ బాక్సులను భద్రపరిచే స్ట్రాంగ్ రూమ్‌ల వద్ద పటిష్టమైన భద్రతా చర్యలు చేపట్టాలని, ఎన్నికల సామగ్రి భద్రత విషయంలో ఎలాంటి నిర్లక్ష్యానికి తావివ్వరాదని అధికారులకు సూచించారు.
పర్యటనలో జిల్లా పరిషత్ సీఈవో నారాయణ మూర్తి, ఏసీపీ అప్పలరాజు, మండల స్పెషల్ ఆఫీసర్, స్థానిక అధికారులు పాల్గొన్నారు.