విశాఖపట్నం, నవంబర్ 7 (ఎక్స్‌ప్రెస్ టుడే): రైతు వ్యతిరేక విధానాలకు నిరసనగా దేశవ్యాప్తంగా భారీ ఉద్యమానికి కార్మిక సంఘాలు సిద్ధమవుతున్నాయని రాష్ట్ర సీఐటీయూ అధ్యక్షులు నర్సింగరావు తెలిపారు. డిసెంబర్ 1 నుంచి ఢిల్లీలో లక్ష మందితో భారీ ఆందోళన నిర్వహించేందుకు కార్మిక సంఘాలు పిలుపునిచ్చాయి.
ఈ ఉద్యమంలో ఆంధ్రప్రదేశ్ నుంచి సుమారు 5 వేల మంది పాల్గొననున్నట్లు నిర్వాహకులు వెల్లడించారు.
కార్మికులకు కనీస వేతనాలు పెంచాలని, ఉద్యోగ భద్రత కల్పించాలని, ప్రభుత్వ రంగ సంస్థలను ప్రైవేటీకరించే నిర్ణయాలను ఉపసంహరించుకోవాలని డిమాండ్ చేస్తున్నారు. ముఖ్యంగా విశాఖ స్టీల్ ప్లాంట్ పరిరక్షణ, ప్రభుత్వ రంగ పరిశ్రమల అభివృద్ధి, కార్మిక హక్కుల రక్షణ వంటి అంశాలను ప్రధాన డిమాండ్లుగా ముందుకు తీసుకొస్తున్నారు.
అలాగే నాలుగు లేబర్ కోడ్లను రద్దు చేయాలని, కార్మికులకు సామాజిక భద్రత కల్పించాలని కోరుతున్నారు.
ఈ నేపథ్యంలో డిసెంబర్ 1 నుంచి ఢిల్లీలో జరిగే ఆందోళనను విజయవంతం చేయాలని కార్మిక, ప్రజా సంఘాల నాయకులు పిలుపునిచ్చారు. ఈ కార్యక్రమంలో సీఐటీయూ రాష్ట్ర అధ్యక్షులు, జిల్లా అధ్యక్షులు, సీఐటీయూ నాయకులు పాల్గొన్నారు.