భారీ వర్షాల నేపథ్యంలో ఎన్నికల నిర్వహణపై అధికార యంత్రాంగం అప్రమత్తం
ఎన్టీఆర్ జిల్లా, నవంబర్ 4 (ఎక్స్‌ప్రెస్ టుడే): భారీ వర్షాల నేపథ్యంలో ఎన్నికల నిర్వహణపై అధికార యంత్రాంగం అప్రమత్తమైంది. ఈ మేరకు జిల్లా కలెక్టర్ డాక్టర్ జి. లక్ష్మీశ అధికారులకు పలు ఆదేశాలు జారీ చేశారు.
పోలింగ్ కేంద్రాల వద్ద వర్షపు నీరు నిలవకుండా యుద్ధప్రాతిపదికన చర్యలు చేపట్టాలని ఆదేశించారు. అధికారులందరూ క్షేత్రస్థాయిలో అప్రమత్తంగా ఉండి ఎన్నికల ఏర్పాట్లను పర్యవేక్షించాలని సూచించారు. బ్యాలెట్ బాక్సులు, ఎన్నికల సామగ్రి తడవకుండా పటిష్ట భద్రతా చర్యలు తీసుకోవాలన్నారు.
వాగులు, వంకలు పొంగే ప్రాంతాల్లో ప్రత్యామ్నాయ మార్గాలు సిద్ధం చేయాలని తహసీల్దార్లను ఆదేశించారు. ఎన్నికల వాహనాల రాకపోకలకు ఆటంకం కలగకుండా క్రేన్లు, జేసీబీలు సిద్ధంగా ఉంచాలని సూచించారు. పోలింగ్, పోలీసు సిబ్బందికి భోజనం, వైద్యం, కనీస సౌకర్యాల్లో లోటుపాట్లు ఉండరాదని స్పష్టం చేశారు.
ముంపు ప్రాంతాలు, ఏటిగట్ల వెంబడి రెవెన్యూ అధికారులు నిరంతరం నిఘా ఉంచాలని, అవసరమైతే డ్రోన్లను వినియోగించాలని తెలిపారు. శిథిలావస్థలో ఉన్న ఇళ్లలోని ప్రజలను వెంటనే పునరావాస కేంద్రాలకు తరలించాలని ఆదేశించారు. ఎన్నికలు ప్రశాంతంగా, సజావుగా జరిగేలా అధికారులు పూర్తి అంకితభావంతో పనిచేయాలని కలెక్టర్ కోరారు.