అమరావతి, అక్టోబర్ 2: స్థానిక సంస్థల ఎన్నికల్లో వెనుకబడిన తరగతులకు (బీసీ) 34 శాతం రిజర్వేషన్లు కల్పిస్తూ ఇచ్చిన ఉత్తర్వులను కొట్టేసిన హైకోర్టు తీర్పును రాష్ట్ర ప్రభుత్వం సుప్రీంకోర్టులో సవాల్ చేయనుంది. వీలైనంత త్వరగా ప్రత్యేక అనుమతి పిటిషన్ (ఎస్ఎల్‌పీ) దాఖలు చేయాలని అడ్వొకేట్ జనరల్‌ను, న్యాయ శాఖ అధికారులను ముఖ్యమంత్రి ఎన్. చంద్రబాబు నాయుడు ఆదేశించారు.
శుక్రవారం ఢిల్లీలో న్యాయ నిపుణులతో సంప్రదింపులు జరిపిన ఆయన, పంచాయతీరాజ్, పురపాలక శాఖల తరఫున వాదనల కోసం సీనియర్ న్యాయవాదులను నియమించాలని సూచించారు. పిటిషన్ శనివారం లేదా సోమవారం దాఖలయ్యే అవకాశం ఉంది. బీసీలకు రిజర్వేషన్లు కల్పించే ప్రభుత్వ ప్రయత్నాన్ని వైఎస్సార్సీపీ అడ్డుకుంటోందని చంద్రబాబు గురువారం ఆరోపించారు. (హన్స్ ఇండియా)