అమరావతి / హైదరాబాద్, అక్టోబర్ 17 (ఎక్స్‌ప్రెస్ టుడే): ఎక్సైజ్ శాఖలో నూతనంగా నియమితులైన అధికారులు నిజాయతీ, క్రమశిక్షణతో విధులు నిర్వహించాలని, ప్రజలకు మెరుగైన సేవలు అందించడమే లక్ష్యంగా పనిచేయాలని రెవెన్యూ (ఎక్సైజ్), గనులు, భూగర్భశాఖల ముఖ్య కార్యదర్శి ముకేశ్ కుమార్ మీనా పిలుపునిచ్చారు. నిషేధ, ఎక్సైజ్ చట్టాలను సమర్థవంతంగా అమలు చేస్తూ, చట్టవిరుద్ధ కార్యకలాపాలపై నిష్పక్షపాతంగా చర్యలు తీసుకోవాలని సూచించారు.
హైదరాబాద్‌లోని హిమాయత్‌సాగర్ తెలంగాణ పోలీస్ అకాడమీలో ఆరు నెలల పాటు ప్రాథమిక శిక్షణ పూర్తి చేసుకున్న ఆంధ్రప్రదేశ్ ప్రొహిబిషన్ అండ్ ఎక్సైజ్ శాఖ అధికారుల పాసింగ్ అవుట్ పరేడ్‌కు ఆయన ముఖ్య అతిథిగా హాజరయ్యారు.
మీనా మాట్లాడుతూ ప్రభుత్వ ఉద్యోగులుగా బాధ్యతాయుతంగా వ్యవహరించాలని, విధుల నిర్వహణలో జవాబుదారీతనం, వృత్తి నైపుణ్యాన్ని పాటించాలని స్పష్టం చేశారు. ఈ కార్యక్రమంలో భాగంగా ప్రొహిబిషన్ అండ్ ఎక్సైజ్ కమిషనర్ శ్రీధర్ చామకూరి శిక్షణ పూర్తి చేసుకున్న అధికారులతో ప్రమాణ స్వీకారం చేయించారు. శాఖ పనితీరును మరింత మెరుగుపరచడంతో పాటు రాష్ట్రవ్యాప్తంగా ఎక్సైజ్ చట్టాలను సమర్థంగా అమలు చేయాల్సిన అవసరాన్ని ఆయన వివరించారు.
ఎన్‌ఫోర్స్‌మెంట్ డైరెక్టర్ రాహుల్ దేవ్ శర్మ మాట్లాడుతూ, ఎక్సైజ్ చట్టాల ఉల్లంఘనలను అరికట్టేందుకు అధికారులు నిరంతరం అప్రమత్తంగా ఉండాలని సూచించారు. వివిధ విభాగాల మధ్య సమన్వయంతో పనిచేస్తూ, నిబంధనలను ఉల్లంఘించే వారిపై కఠిన చర్యలు తీసుకోవాలని అన్నారు.
మొత్తం 147 మంది నూతన అధికారులు ఆరు నెలల శిక్షణను విజయవంతంగా పూర్తి చేసుకున్నారు. వీరిలో 146 మంది నేరుగా నియమితులైన ప్రొహిబిషన్ అండ్ ఎక్సైజ్ సబ్‌ ఇన్‌స్పెక్టర్లు కాగా, ఒకరు అసిస్టెంట్ ప్రొహిబిషన్ అండ్ ఎక్సైజ్ సూపరింటెండెంట్ (ఏపీఈఎస్). 146 మంది సబ్‌ ఇన్‌స్పెక్టర్లలో 41 మంది మహిళలు, 105 మంది పురుషులు ఉన్నారు.
శిక్షణ పూర్తి చేసుకున్న అధికారులు త్వరలో ఆంధ్రప్రదేశ్‌లోని వివిధ ప్రాంతాల్లో క్షేత్రస్థాయి శిక్షణకు హాజరుకానున్నారు. ఈ శిక్షణ ద్వారా విధుల నిర్వహణలో ప్రత్యక్ష అనుభవం సంపాదించి, ఎక్సైజ్ చట్టాల అమలును మరింత పటిష్టం చేసేందుకు సిద్ధం కానున్నారు.