అనకాపల్లి, సెప్టెంబర్ 21: ఈవీఎం గోడౌన్ వద్ద సిబ్బంది అనుక్షణం అప్రమత్తంగా ఉండాలని జిల్లా కలెక్టర్ విజయ క్రిష్ణన్ సిబ్బందిని ఆదేశించారు. జిల్లా ఎస్పీ కార్యాలయం వద్ద ఉన్న ఈవీఎం గోడౌన్‌ను నెలవారీ తనిఖీల్లో భాగంగా సోమవారం ఉదయం వివిధ రాజకీయ పార్టీల ప్రతినిధులతో కలిసి జిల్లా కలెక్టర్ విజయ క్రిష్ణన్ తనిఖీ చేశారు.
ఈ సందర్భంగా కలెక్టర్ అక్కడ పరిస్థితులను గమనించారు. సీసీ కెమెరాల పనితీరును, ప్రధాన ద్వారానికి ఉన్న సీళ్లను పరిశీలించారు. పరిస్థితులను క్షుణ్ణంగా పరిశీలించి, భద్రతా ప్రమాణాలపై అధికారులకు, సిబ్బందికి పలు సూచనలు చేశారు. తనిఖీ క్రమంలో లాగ్ బుక్‌లో సంతకం చేశారు. భద్రతా ప్రమాణాలు, లాగ్ బుక్ నిర్వహణ ఇతర అంశాలపై అధికారులు మరియు నేతలతో మాట్లాడారు. భద్రపరిచిన ఈవీఎంల స్థితిగతులను జిల్లా కలెక్టర్‌కు ఎన్నికల విభాగం అధికారులు వివరించారు.
వివిధ రాజకీయ పార్టీల నేతలతో డిఆర్‌ఓ వై. సత్యనారాయణ రావు సమీక్ష
నెలవారీ సమావేశాలలో భాగంగా రాజకీయ పార్టీల ప్రతినిధులతో సోమవారం డిఆర్‌ఓ వై. సత్యనారాయణ రావు తన చాంబరులో ఎన్నికల జాబితా నవీకరణ ప్రక్రియపై సమావేశం నిర్వహించారు. ఈ సందర్భంగా డిఆర్‌ఓ మాట్లాడుతూ గుర్తింపు పొందిన రాజకీయ పార్టీలన్నీ బూత్ లెవల్ అధికారులతో సమన్వయంతో పనిచేయాలని, ఓటర్ల సంఖ్య, పోలింగ్ స్టేషన్లు తదితర అంశాలపై చర్చించి రానున్న ఎన్నికలు సజావుగా నిర్వహించేందుకు సహకరించాలని కోరారు.